မောင်ကျောင်းသားတို့ ဘွဲ့လွန်ကျောင်းသားတွေက အဆူခံရတဲ့အရွယ်တွေမဟုတ်ကြတော့ပေမယ့် ဒီနေ့ ဘာသာရပ်ဆိုင်ရာအကြံပေးပါမောက္ခဆူတာ တစ်တန်းလုံးခံရပါတယ်။ မောင်ကျောင်းသားအကျင့်ကလည်း အဆူခံရတဲ့အချိန်ဆိုရင် သေချာနားထောင်ပေမယ့် ရင်ခေါင်းထဲက ရယ်ချင်တဲ့စိတ်က လှိုက်လှိုက်တက်လာတာ မနည်းမျက်နှာပိုးသေအောင် နေရပါတယ်။ ကို့ရိုးကားယားအခြေအနေကို မောင်ကျောင်းသားခန္ဓာကိုယ်က လက်ခံဖို့ တုန့်ပြန်တာ ဒီတစ်မျိုးကတော့ နည်းနည်းဂွကျပါတယ်။ တကယ်က ဆရာာမက ဆူတယ်ဆိုပေမယ့်လည်း စိတ်နှလုံးကို ထိခိုက်နစ်နာပါစေ၊ ကျောင်းသားဂုဏ်သိက္ခာညိုးပါစေ၊ ငါဆရာပဲပြောချင်တာပြောမယ်လို့မဟုတ်ပဲ ကရုဏာနဲ့ အကျိုးအကြောင်းရှင်းပြပြီး ဆူတာပါ။
ဖြစ်ပုံက မောင်ကျောင်းသားတို့တက်တဲ့ဘာသာရပ်မှာ ဘာသာရပ်ဆိုင်ရာလုပ်ငန်းကော်မတီရှိတယ်။ အဲ့ကော်မတီကို ဒုတိယနှစ်ကျောင်းသား/သူတွေဖြစ်ပြီဆိုရင် ဦးဆောင်ရတယ်။ ကော်မတီရဲ့အဓိကအလုပ်က မေဂျာရဲ့တစ်နှစ်ပတ်လုံး အတန်းတွင်း၊အတန်းပြင်ပ လှုပ်ရှားမှုတွေဦးဆောင်ရတယ်၊ ဒေသခံဖွံ့ဖြိုးရေးအဖွဲ့တွေနဲ့ ကွန်ရက်ချိတ်ဆက်ရတယ်၊ ပထမနှစ် ခုမှစရောက်တဲ့သူတွေ အခြေကျအောင် ကူညီရတယ်။ အဲ့ဒါတွေအားလုံးကို ဘာသာရပ်ဆိုက်ရာအကြံပေးပါမောက္ခနဲ့လမ်းညွှန်ချက်နဲ့လုပ်ရတယ်။
ကော်မတီက ဥက္ကဌ၊ ဒုဥက္ကဌ စသဖြင့် ရာထူး ၅ခုနဲ့ ဖွဲ့စည်းထားပြီး ဒီမိုကရေစီနည်းကျ မဲပေးပြီး အရွေးခံရတာပါ။ ကိုယ်ကိုယ်တိုင်ဖြစ်စေ၊ အတန်းဖော်ချင်းချင်းဖြစ်စေ စိတ်ဝင်စားတဲ့ရာထူးကို နာမည်စာရင်းသွင်းပြီး ရွေးကောက်ခံလို့ရပါတယ်။ ကော်မတီရဲ့သဘောသဘာဝက တော်တော်လွတ်လွတ်လပ်လပ်ရှိပါတယ်။ စည်းမျဥ်းစည်းကမ်းတွေအများကြီးတင်းကြပ်မထားသလို အတန်အသင့်သုံးနိုင်တဲ့ဘတ်ဂျက်လည်းရှိတယ်။ အထက်အောက်ဝါဇင်တွေမရှိသလို ပထမကော်မတီလုပ်ခဲ့တဲ့အလုပ်တွေအတိုင်း နောက်ထပ်ရွေးကောက်ခံပြီးတက်လာတဲ့ကော်မတီက အပ်ကျမတ်ကျ လုပ်စရာမလိုဘူး။ ကိုယ့်အတန်းသားတွေအားလုံးသဘောတူနိင်တဲ့ ဘုံဦးတည်ချက်၊ မျှော်ရည်ချက်ပန်းတိုင်တွေအရ ကော်မတီက လုပ်ပိုင်ခွင့်ရှိတယ်။ ဥပမာ ဒီနှစ် ဒုတိယနှစ်ကျောင်းသားတွေဦးဆောင်တဲ့ကော်မတီဆိုရင် သူတို့ရဲ့အဓိကဦးစားပေးက ကျောင်းမှာ ဘွဲ့လွန်အစီအစဥ်တွေအားလုံးမှာ မောင်ကျောင်းသားတို့ "ဆက်သွယ်ဆက်ဆံရေးနဲ့ဖွံ့ဖြိုးရေး - Communication and Developement (CommDev)" ဘာသာရပ်က ရှေ့တန်းကဦးဆောင်နေနိုင်ဖို့ ဖြစ်တယ်။ အဲ့အတွက် ဝဘ်စာမျက်နှာ၊ လူမှုကွန်ယက်စာမျက်နှာမှာ ဘာသာရပ်ဆိုင်ရာလှုပ်ရှားမှုနဲ့သတင်းတွေ စဥ်ဆက်မပြတ်တင်ဆက်တာကစလို့ ဒီဘာသာရပ်ရဲ့သဘောသဘာဝအရ လူမှုပြုပြင်ပြောင်းလဲမှုတွေဖြစ်ဖို့ လှုပ်ရှားနေတဲ့ ဒေသခံလူမှုရေးအဖွဲ့တွေကိုသွားပြီး လေ့လာနိုင်ဖို့စသဖြင့် ကျောင်းပရဝဏ်မှာ ဒီဘာသာရပ်နဲ့ကျောင်းသားတွေက ထင်ပေါ်နေဖို့ လုပ်ကြပါတယ်။ တကယ်လည်း ဘယ် program ကလဲလို့မေးလို့ CommDev ကလို့ဖြေရင် "သိပါ့... အရမ်းတက်ကြွကြတဲ့ဘာသာ" လို့ သြဘာပေးကြတာရှိသလို "နေရာတကာ သူတို့" လို့ မျက်မှောင်ကျုံ့ကြတဲ့ ဆန့်ကျင်ဘက်တုန့်ပြန်မှု ၂မျိုးရတဲ့အထိ တက်ကြွကြတဲ့ဘာသာပါ။
တကယ်က အရင်းရှင်နိုင်ငံပီပီ ပညာရေးစနစ်ကလည်း အရင်းရှင်စနစ်မို့တက္ကသိုလ်တွေတစ်ခုနဲ့တစ်ခုကလည်း အပြိုင်အဆိုင်ဖြစ်နေကြတာပေါ့။ ပညာရေးကနေ အကျိုးအမြတ်အစွန်းဘယ်လောက်ရသလဲ ကြည့်ချင်ကြည့်၊ ဒါမှမဟုတ် သက်ဆိုင်ရာဘာသာရပ်အလိုက် သုသေတနစွမ်းဆောင်မှုဘယ်လောက်နာမည်ရှိသလဲ ကြည့်ချင်ကြည့် အဲ့လိုစံနှုန်းတိုင်းတာမှုတွေရှိနေတာလည်း တစ်ကြောင်းပေါ့လေ။ ဒါတောင် မောင်ကျောင်းသားတက္ကသိုလ်ဆို လူသိများကြတဲ့ ဟားဗတ်တက္ကသိုလ်တို့၊ ရေးတက္ကသိုလ်စတဲ့ ဒိတ်ဒိတ်ကျဲပုဂ္ဂလိကပိုင်တက္ကသိုလ်မဟုတ်ပဲ သုတေသနတွေနဲ့ဘွဲ့လွန်အစီအစဥ်တွေတော်တော်များများက ဖယ်ဒရယ်အစိုးရရဲ့ရန်ပုံငွေထောက်ပံ့မှုနဲ့ လည်ပတ်နေတဲ့ အစိုးရတက္ကသိုလ်ဖြစ်ပါတယ်။ ဒါပေမယ့် အစိုးရကျောင်းဖြစ်သည့်တိုင် ပညာသင်နှစ်တစ်နှစ်ကို ဘာသာရပ်အသီးသီးကိုလျှောက်ထားတဲ့ ကျောင်းသားလျှောက်လွှာဘယ်နှစ်စောင်ရသလဲကစလို့ သင်ရိုးညွှန်းတမ်းပုံစံ၊ အချက်အလက်ခိုင်မာတဲ့ သုတေသနစာတမ်းထွက်တဲ့နှန်းစသဖြင့် တိုင်းတာပြီး ဒီဘာသာရပ်ကို ဆက်ဖွင့်သင့်မဖွင့်သင့် နှစ်အလိုက် အကဲဖြတ်စစ်တမ်းတွေလုပ်ကြတာမလို့ ဘာသာရပ်အသီးသီးကို ညွှန်ကြားရေးမှုး တာဝန်ယူထားကြတဲ့ ပါမောက္ခတွေကလည်း အပြိုင်အဆိုင်ရှိကြသလို ကိုယ့်ဘာသာရပ်ကိုယ် အရည်အသွေးရော၊ နာမည်ရော ရှိနေအောင် စွမ်းဆောင်ကြရပါတယ်။
ဒီနှစ်ဝက်တစ်တန်းပြီးလို့ ဒုတိယနှစ်ရောက်မှာဆိုတော့ ဒီစာသင်နှစ်ဝက်မှာ အတန်းတွင်းရွေးကောက်ပွဲကို ခုလက်ရှိကော်မတီက ဦးဆောင်လုပ်တော့မှာပါ။ သို့ပေသိ ခုနှစ် ကော်မတီဝင်တွေရော၊ ဒုတိယနှစ်အတန်းသားတွေကအားလုံးလိုလို တက်တက်ကြွကြွရှိကြသလောက် မောင်ကျောင်းသားတို့ ပထမတစ်သုပ်လုံးက ကော်မတီရွေးကောက်ပွဲကို တက်တက်ကြွကြွမရှိကြတာပါ။ မောင်ကျောင်းသားကတော့ ဦးဆောင်သူထက် နောက်ကနေ လိုအပ်တဲ့နေရာလိုသလိုဖြည့်တဲ့ ပံ့ပိုးသူနေရာပဲ အမြဲစိတ်ဝင်စားတဲ့သူမလို့ ကိုယ့်ကိုယ်ကိုယ်တော့ နာမည်စာရင်းမသွင်းဖူးလို့ ဆုံးဖြတ်ထားပြီးသားပါ။ ဦးဆောင်တဲ့သူကောင်းပေမယ့် နောက်ကနေ အကောင်းဆုံးပံ့ပိုးပေးတဲ့သူမရှိရင်လည်း ဘယ်အလုပ်မှဟန်ချက်ညီညီ မအောင်မြင်နိုင်ဘူးမလား။ တခြားသူတွေကလည်း နာမည်စာရင်းပေးဖို့ ဘောလီဘောပုတ်သလို လုပ်နေကြတာမလို့ ဆရာမ မခံချိမခံသာဖြစ်လာဟန် တူပါတယ်။
တကယ်က မောင်ကျောင်းသားက လက်တလောမှာ ဘွဲ့လွန်အစီအစဥ်လက်ထောက်အလုပ် လက်ခံရထားတာမလို့ ဒီနေ့အတန်းမစခင် ဆရာမနဲ့စဆွေးနွေးအပြီး အချိန်နည်းနည်းပိုနေလို့ ရွေးကောက်ပွဲကိစ္စရောက်ရင်း ဆရာမက မောင်ကျောင်းသားကို သူသိချင်တာတွေ တီးခေါက်ပြီး မေးမြန်းပါတယ်။ ဟိုလူက စိတ်ဝင်စားတယ်ပြောလား၊ ဟိုတစ်ယောက်က စိတ်ဝင်စားပုံရလား သူမျက်စိထဲ ဦးဆောင်နိုင်မယ်လို့မြင်တဲ့သူတွေကို မေးတာပေါ့လေ။ ဘယ်နေရာရောက်ရောက် ပဲလှော်ကြားဆားညှပ်သလို ညှပ်ခံရတဲ့ကုသိုလ်ပါလာလေ့ရှိတဲ့ မောင်ကျောင်းသားက ကာကယံရှင်တွေဆန္ဒမပါပဲ ကိုယ့်ထင်မြင်ချက်နဲ့ကိုယ်ဖြေတာမျိုးမဖြစ်ရအောင်ရော၊ ကိုယ်အဖြေမတတ်လို့ အတန်းဖော်တွေဒုက္ခရောက်မှာမလိုလားတာမို့ တော်တော်လေး သတိထားဖြေရတာပေါ့လေ။ သူနဲ့ကတော့ ငါနဲ့အဲ့အကြောင်းမဆွေးနွေးဖြစ်ဘူး၊ အဲ့တစ်ယောက်ကတော့ သူ့ကိုယ်သူထက် အတန်းဖော်ကို နာမည်စာရင်ပေးဖို့ အလွတ်သဘောပြောတာမျိုးတော့ ရှိတယ် စသဖြင့် ကြိုးတန်းပေါ်လမ်းလျှောက်သလို ဘယ်ဖက်လည်းမယိမ်း၊ ညာဖက်လည်းမယိမ်း ဖြေခဲ့ပေမယ့် အင်မတန်အကင်းပါးလို့ ဆရာမလုပ်နေသူပီပီ အတန်းအစမှာ ဆူပါလေရော။
သူ ဆူပေမယ့် အင်မတန် ပညာရှင်ဆန်ဆန်ဆူတာပါ။
ဘွဲ့လွန်အစီအစဥ်လာတက်တာမလို့ စာလုပ်ကြရတယ်ဆိုတာ ဘွဲ့လွန်ကျောင်းသားတွေလုပ်ရတဲ့ ရေပြင်ညီစံနှုန်းပဲဖြစ်ပြီး ဒါကို ကိုယ့်ရဲ့ အမြင့်ဆုံးစံနှုန်းအနေနဲ့ထား ထားတယ်ဆိုရင် ပြန်သုံးသပ်သင့်ကြောင်း၊ စာလုပ်တာ အရေးကြီးပေမယ့် ဒီဘာသာရပ်မှာ သုသေတနရန်ပုံငွေတွေ များများခွဲဝေရထားတာ ခုလို လှုပ်ရှားမှုတွေ ကျောင်းပရဝဏ်မှာ လျှံလျှံတောက်ရှိနေလို့ ဖြစ်ကြောင်း၊ အဲ့အခွင့်အလမ်းတွေ ခု ကိုယ်ရနေသလို ကမ္ဘာ့နိုင်ငံအနှံ့က လာမယ့်နှစ်တွေမှာ လာတက်မယ့် ရပ်ရွာအသီးသီးက လူမှုရေးရာအပြောင်းအလဲဖော်ဆောင်နေတဲ့သူတွေ ဆက်ရနေဖို့ မောင်ကျောင်းသားတို့မှာ ကျင့်ဝတ်အရ လက်ဆင့်ကမ်းရမယ်ဆိုတဲ့ရှုထောင့်ကနေစဥ်းစားကြည့်ဖို့ သူ အကြံပေးကြောင်း စသဖြင့်ပါ။
ရေးပြတော့သာ တိုပေမယ့် မိနစ် ၂၀လောက်ကြာပါတယ်။ အတန်းဖော် ၂ ယောက်ကတော့ သူတို့ရွေးကောက်ပွဲအတွက် အဆင်သင့်ဖြစ်နေသလို အားလုံးလည်း ဝိုင်းဝန်းကြဖို့ လိုလိုလားလားရှိကြပါတယ်ပြောပြီး ချော့ကြပါတယ်။
ချစ်စရာကတော့ ချော့တော့လည်း ရယ်ရယ်မောမော ချက်ချင်းဖြစ်ပြီး အားလုံး ဟီးဟီးဟားဟား ပြန်ဖြစ်သွားကြတာပဲ။ အဖြေတတ်အောင် ဖြေခဲ့တဲ့ကြားက အားလုံးအဆူခံရလို့ ငါဟာအမြဲ ပဲလှော်ကြားကဆားလို့တွေးပြီး ရယ်ချင်တဲ့မောင်ကျောင်းသားလည်း အားလုံးနဲ့ရောယောင်ပြီး အဲ့တော့မှ မတရား ရယ်ချလိုက်ရပါတယ်။
ကျောင်းအကြောင်းကို ခုကိစ္စလေး စပြီးတို့ထိရေးပြီး မျှဝေတာပါ။ မောင်ကျောင်းသားရဲ့ အိုဟိုင်ယိုးတက္ကသိုလ်နဲ့ CommDev ဘာသာရပ်အကြောင်း ဗဟုသုတအလို့ငှါ နောင်မှာ တတ်နိုင်သမျှရေးမယ် ဆုံးဖြတ်ထားပါတယ်။ အမေရိကန်ရွေးကောက်ပွဲအပြီးအပြောင်းအလဲတွေရဲ့အကျိုးဆက်နဲ့ မောင်ကျောင်းသားရဲ့ပညာသင်ဆုလည်း အပြောင်းအလဲတွေရှိပါတယ်။ ကျောင်းတော်ကြီးနဲ့ ဆရာ/မတွေ၊ ဌာနမှူးရော၊ တခြားသက်ဆိုင်ရာဌာနတွေပါမကျန် မတုန့်မဆိုင် အင်တိုက်အားတိုက် ၄၈နာရီလောက်အတွင်း စည်းဝေးတွေလုပ်၊ ရန်ပုံငွေတွေရှာပေးနဲ့ ကြိုးပမ်းပေးလို့ ဘွဲ့ရတဲ့အထိ ကျောင်းဆက်တက်ဖို့ အဆင်ပြေသွားခဲ့ပါတယ်။ ဒီကျေးဇူးကို ဒီတက္ကသိုလ်နာမည် ကျနော့်အသိုက်အဝန်းမှာ ပိုသိဖို့၊ ပိုထင်ကျန်ဖို့၊ မောင်ကျောင်းသားရဲ့ဘာသာရပ်အစီအစဥ်ကို ပိုစိတ်ဝင်စားပြီး သိလာဖို့၊ ဒီဘာသာရပ် ကျောင်းတော်ကြီးမှာ ဆက်လက်အဒွန့်ရှည်ဖို့ စာရေးပြီး ကျေးဇူးဆပ်ပါမယ်။ နိုင်ရာ သဲတစ်ပွင့်ပေါ့လေ။စာဖတ်ပေးပြီး မေတ္တာပြပေးတဲ့ အပေါင်းအသင်းမိတ်ဆွေတွေကို ကျေးဇူးပါခင်ဗျာ။
ဒီမျှသာ
မောင်ဆိုင်မွန်
၂၀၂၅ခုနှစ်၊ ဖေဖော်ဝါရီလ ၁၂ ရက်
အေသင်၊ အိုဟိုင်းယိုးပြည်နယ် (ခေတ္တ)
No comments:
Post a Comment