လုပ်အားသွားပေးတဲ့ ဝမ်ဒါတို့ ဒီမိုကရက်ပါတီက ကိုယ်စားလှယ်လောင်းတွေတစ်ယောက်မှ ရွေးကောက်ပွဲမနိုင်ပါဘူး။ မနိုင်မယ့်အပြင် အိုဟိုင်းယိုးပြည်နယ်ကိုယ်စားပြု အထက်လွတ်တော်အမတ်တစ်ယောက်က သူမူလနေရာကိုထပ်ဝင်အရွေးခံတာမှာတောင် ထရမ့်ပါတီကအမတ်လောင်းက နိုင်သွားလို့ (အဲ့လို ပထမရွေးကောက်ပွဲမှာနိုင်ထားတဲ့နေရာကို ပြန်အရှုံးပေးလိုက်ရတာ ပြည်နယ်၄ခုလောက်မှာဖြစ်လို့) ထရမ့်ပါတီက အထက်လွှတ်တော်မှာ အမတ်အများစုနဲ့ထိန်းချုပ်ခွင့်ရသွားပါတယ်။ အောက်လွှတ်တော်လည်း ထိုနည်းတူပါပဲ။
လောလောဆယ်တော့ ဒီမိုကရက်ပါတီက သမ္မတလောင်းလည်းရှုံး၊ ပါတီကလည်း အထက်လွှတ်တော်ရော၊ အောက်လွှတ်တော်မှာပါ လူနည်းစုနေရာကနေပဲ နေရမှာမို့ ပါတီတွင်းမှာလည်း သူ့ကြောင့်ငါကြောင့် လက်ညှိုးထိုးအပြစ်ဖို့နေကြတာပေါ့လေ။ မဲပေးတဲ့အချက်အလက်ဒေတာတွေကိုကြည့်ရင်လည်း ဒီမိုကရက်တွေကြီးစိုးပြီး အမြဲအနိုင်ရဖို့သေချာတဲ့ နျူးယောက်ခ်လိုပြည်နယ်မှာတောင် ဒီမိုကရက်ပါတီကို မဲပေးတဲ့နှုန်းကျတာမျိုးတွေလည်း ဖြစ်နေတာကို ထောက်ပြကြပါတယ်။ တချို့မဲဆန္ဒရှင်တွေကလည်း သမ္မတနေရာကိုတော့ ဒေါ်နယ်လ်ထရမ့်ကိုမဲပေးပြီး အထက်လွှတ်တော်၊ အောက်လွှတ်တော်နဲ့ ဒေသန္တရနေရာတွေမှာတော့ ဒီမိုကရက်တွေကိုပဲ ပေးတာမျိုးတွေလည်း ရှိတာကို မဲရုံပြင်ပစစ်တမ်းတွေက ထောက်ပြပါတယ် (သူတို့ မဲပေးတဲ့ပုံစံက ကျနော်တို့ဆီမှာလို တိုင်းဒေသကြီး/ပြည်နယ် အတွက် တစ်ခါ၊ ပြည်သူ့လွှတ်တော်အတွက် တစ်ခါ၊ အမျိုးသားလွှတ်တော်အတွက် တစ်ခါ ဝင်လိုက်ထွက်လိုက် မဲပေးရတာမဟုတ်ပါဘူး။ ပြည်နယ်အလိုက် နေရာလစ်လပ်တဲ့ ကိုယ်စားလှယ်လောင်းတွေ တစ်ခုချင်း တန်းစီးရေးထားသလို၊ ပြည်နယ်အလိုက် မဲခွဲဆုံးဖြတ်ဖို့ရှိတဲ့ အရေးကိစ္စတွေ ဥပမာ- ကိုယ်ဝန်ဖျက်ချခွင့်ကစလို့ စာကြည့်တိုက်ရန်ပုံငွေတိုးဖို့ကိစ္စတွေအထိ ထည့်ထားတဲ့ စာရွက်ရှည်ကြီးမှာ တခါတည်း မဲပေးရတာပါ)။
ရွေးကောက်ပွဲညနေမှာ ဝမ်ဒါကို ခြေနေကောင်းပါစေ၊ နိုင်ပါစေဆိုပြီး ဆုတောင်းပေးတဲ့ မက်ဆေ့ပို့လိုက်ပါသေးတယ်။ မဲရုံတွေပိတ်ပြီးချိန်တော့ သူတို့ မြို့လယ်က ဘားမှာ မဲရေတွက်တာစောင့်ကြည့်ကြမှာမို့လာခဲ့လေလို့ ခေါ်ပေမယ့် ကျောင်းမှာကြည့်နေကြတာမို့ မသွားဖြစ်တော့ပါဘူး။ မသွားလိုက်တာပဲ ခပ်ကောင်းကောင်း။ ဘောလုံးပွဲကစလို့ ရွေးကောက်ပွဲအထိ ကိုယ်အားပေးတဲ့ဖက်ကချည်း ရှူံးတာများ၊ ရှုံးတတ်လို့ နောက်ဆို သူများရွေးကောက်ပွဲ စိတ်ရောကိုယ်ပါ လိုက်ကြည့်၊ ခံစားတာ မလုပ်မှလို့ ကိုယ့်ဘာသာ ဆုံးမထားပါတယ်။ (ကိုယ်မဲထည့်၊ ကိုယ်အားပေးတာ နိုင်တဲ့ ကိုယ့်နိုင်ငံရွေးကောက်ပွဲကြတော့လည်း လုယူတာခံရ)။
ဘာပဲဖြစ်ဖြစ် ဒီနွေမှာ လုပ်အားပေး သုံးခါသွားလိုက်ရတာ အမြတ်ပါပဲ။ ပုံကတော့ ပါးမှာ ပိုးဝင်ပြီးအနာပေါက်၊ ဖျားပြီးစဖြစ်နေတာတောင် စာ အားတုန်းလေးသွားအုံးမှဆိုပြီး အပြာမှအပြာ ဒီမိုကရက်ဆိုပြီး တက်ကြွတဲ့ကြက်ဖဖြစ်နေတုန်းကပုံ။
